مدرسة طه حسين_النزهة الجديدة
مأساة إنسانية يعيشها زهور مدرسة طه حسين الإبتدائية المشتركة بالنزهة الجديدة بالقاهرة وأولياء أمورهم .. مأساة تنتظر كارثة لهذه البراعم الصغيرة بداية من مدير مدرسة يسب الدين للأطفال وفصول عبارة عن نعوش طائرة تم حشر 130 طفل في الفصل الواحد بعد إلغاء الفترة الثانية وتحويل المدرسة المنكوبة إلى فترة واحدة ..
بجرة قلم من مدير إدارة تعليمية غير مسئول تحولت مدرسة طه حسين الإبتدائية المشتركة من عروس مدارس النزهة الجديدة إلى ثكنات عمال تراحيل .. حيث قام مدير الإدارة المبجل «محمد مصطفى» بإستبعاد السيدة إيمان أحمد مديرة المدرسة التي كان يناديها التلاميذ بـ«ماما» وتحظي بإحترام وحب جموع أولياء الأمور وتعيين مدير جديد أخلاقه أخلاق عربجية وأطفال شوارع .. وجعل المدرسة التي تضم أكثر من 2100 تلميذ فترة واحدة بدلا من فترتين وحشر كل فصلين في فصل .. والنتيجة كما يرويها أولياء الأمور:
انهرده في المدرسه مستر خالد حسبي الله ونعم الوكيل فيه منزلش االاولاد الصغيرين فسحه وفي اولاد عملو بيبي علي نفسهم وسنه خامسه وسادسه ضم كل فصلين علي بعض من كثافة الطلاب ..
انا فعلا والله بتمني ميس ايمان ترجع المدرسه كان في نظام ونشاطات وكانت واقفه دايما في وسط الحوش وكانت تدخل تشرح بنفسها كانت ام قبل متكون مديره كانت رحيمه باولياء الأمور والطلبه كل الطلبه بيحبوها وبيتمنوها ترجع يارب ترجع ..
بجد ميس ايمان غيرت المدرسه ١٨٠ درجه والله كانت متفرقش عن المدارس الخاصه .. المدير الجديد مستر خالد « مدير المدرسة» قال اولي وتانيه وتالته 95 طفل في الفصل وباقي المراحل 130 طالب .. يرضي مين ده ..
منهم لله مخلينا جايبين دسته ورق تصوير في التقديم وماضين علي إقرار غصب أن محدش اجبرنا مجيب حاجه .. انا بقي دافعه 2000جنيه .. أنا كمان والله دافعه ٢٠٠٠جنيه حسبي الله ونعم الوكيل فيهم .. جزارين مش معلمين ابدا ازاي دول يربو اجيال هيطلعو اجيال فاسده ..
السيد وزير التربية والتعليم .. حضرتك قلت إن خطة الوزارة تحويل المدارس إلى جاذبة للتلاميذ .. في مدرسة طه حسين الإبتدائية المشتركة المدرسة طاردة للتلاميذ .. تخيل حضرتك لما طفل عنده 6 سنوات يسمع المدير بيسب الدين ومحشور في فصل به 100 طفل وبيقعد في الفصل من 8 صباحا لـ2 ظهرا .. تفتكر هيحب المدرسة حضرتك .. عشرات الأطفال كرهوا التعليم والمدرسة من أول يوم وممكن حضرتك تعاين بنفسك..
