الوزير الجديد في قنا
ما بين نظرية طبق الكشري وحبل الخروف وهات شاي أم حسن راح الوزير الجديد محمد عبد اللطيف وزير التربية والتعليم يبحث عن حلول للمشكلات المزمنة للعملية التعليمية وارتفاع كثافة الفصول والعجز في أعداد المعلمين والعجز في أعداد المدارس .. زيارات هات شاي أم حسن والإستعانة بصديق من عصابة بطن الزير كلها تؤدي إلى نتيجة واحدة .. يأتي وزير يرحل وزير المعلم هو المسحول .. تعليم: لا يوجد .. شرح في المدارس: لا يوجد .. مافيا الدروس الخصوية والسبوبة تحكم ..
تفتق ذهن الوزير الجديد وصديقيه محمد عطية رئيس الإدارة المركزية للتعليم بمصروفات وخالد عبد الحكم رئيس الإدارة المركزية لشئون المديريات عن أن الحل في نظرية الكشري .. لو واحد معاه طبق كشري وأخدنا منه معلقة من غير ما ياخد باله هيحس بحاجة .. وانتهى الثلاثة إلى مقترح تحويل الثانوي العام بمراحله الثلاثة إلى فترة مسائية والإعدادي والإبتدائي فترة صباحية .. وطبعا ده على اعتبار إن طلاب ثانوي كدة كدة م بيروحوش المدارس وبيكتفوا بالسناتر والدروس الخصوصية ..
أيوة يا معالي الوزير هيحس لأن حضرتك كدة ألغيت حضور طلاب ثانوي رسميا للمراحل الثلاثة وأضفت عبء جديد في عجز المعلمين .. باختصار حضرتك بتعالج شيء على حساب شيء ودي أفكار بلدي اتعملت كتير في عصور كتير ولم تحل أي مشكلة بل كان ضرها أكثر من نفعها .. علاوة على أن نظرية الكشري سوف تصطدم حتما بأصدقائك أصحاب نظرية حبل الخروف بتاعت أنور وجدي ..
ولأن شركاء الوزير في حل معضلات التعليم اللي هم السبب فيها لديهم عقم في الأفكار ومن معتنقي نظرية حبل الخروف بتاع أنور وجدي وطول عمرهم وظيفتهم على المدفع: يجيبوا شاي أم حسن اقترحوا نظرية ملعقة من طبق الكشري: إلغاء الثانوية العامة بمراحلها الثلاثة لحل أزمة الكثافة في الفصول وزيادة العجز في المعلمين ..
يا معالي الوزير نفس المدرس الذي يتحجج بزيادة الكثافة في الفصول وأن زيادة كثافة الفصول عائق في توصيل المعلومة هو نفس المعلم الذي يشرح لـ 2500 طالب في قاعة سينما أو مسرح وقادر على توصيل المعلومة لآخر طالب من الـ 2500 الفارق الوحيدة هو البنديرة .. في الحكومة ضامن مرتبه .. شرح أو ما شرحش هياخد مرتبه لكن في السنتر بيقبض بالدولار وفوري ..
معالي الوزير نظرية الكشري ليست هي الحل في مواجهة شبح تسريب الطلاب لسناتر الدروس الخصوصية .. حضرتك محتاج تطبق القوانين واللوائح وتبحث عن رواتب مجزية للمعلمين وأن يكون الأجر مقابل عمل وليس مقابل 21 توقيع في الشهر .. حضرتك محتاج تغير العتبة القديمة وتنسف أصحاب نظرية حبل الخروف وشاي أم حسن ..
حضرتك بتستخدم نفس العناصر التي كانت وراء تدمير التعليم لتطوير التعليم ومنتظر نتائج مختلفة .. يعني هل لو أعدنا ترتيب ما هو حاصل جمع 3و2و7 هنفرق عما لو قلت: 7 و3 و2 يساوي كام .. طب إزاي حضرتك في وزارة إعادة تدوير القيادات الفاشلة والفاسدة .. اللي ريحته طلعت هنا يروح هناك واللي فشل هناك يروح هنا وكدة ينفع وكدة ينفع ..
