المدارس القومية خرجت عن السيطرة وتديرها عصابات ورئيس المعاهد: البتاعة دي بتشتغل إزاي

محمد عبد اللطيف_وزير التربية والتعليم

مدير مدرسة كلية النصر للبنات «» بالإسكندرية وهو مدرس تاريخ بالمعاش استقال الأسبوع الماضي على خلفية الكشف عن اختلاسات في المدرسة واليوم حضر للمدرسة وأعلن عودته للعمل مجددا .. استقال واتعالج ورجع مع نفسه وعلى نفسه بناء على رغبة الماميز اللي مدورين الكلية ..

مديرة محمد كريم بالإسكندرية انقطعت عن العمل 4 شهور ورجعت عادي .. وبتروح يوم وبتعمل تفويض 20 يوم في الشهر والمدرسة سمك ولبن وتمر هندي وسناتر وبيع امتحانات ومأجرين الباصات لسواق ميكروباص وبناته نايمين 24 ساعة في المدرسة والمدرسة عاملة لهم مكاتب ..

في كلية البنات زيزنيا اللي مدورها عامل أسانسيرات ولي أمر هو وصديقته مدام موممبار بتاعت الفرنساوي .. والمديرة بركة تم التجديد لها بعد المعاش بالرشاوي وظيفتها تبصم على ما تفعله عصابة عامل صيانة الأسانسيرات ومدام موممبار ..

في ليسيه الحرية بالإسكندرية مجلس الإدارة وعصابة مدام شلاطة مدورينها .. هدم مباني وبناء غرف ومكاتب وبناء واحد كانتين جديد لدرجة أفزعت هيئة الأبنية التعليمية بالوزارة فقامت بإجراء معاينة ومسح لجميع المدارس القومية ..

في مدرسة شبرا القومية .. تم زيادة المصروفات 700% عادي واللي مدوراها المدير المالي السابق طردها من قومية العجوزة وبطلة فضيحة الـ 60 ألف جنيه اللي كانت مخبياهم تحت النقاب فيما إن مدير المدرسة مش عارف هو بيشتغل ايه وميقدرش يكسر كلام شيخة منصر الإدارة المالية ..

في ليسيه الهرم .. يسري نصار المدير المالي للمعاهد القومية ومدرسة الحرية القومية بالدقي معا .. فاتحها سبيل لتعيين أقاربه ومعاه سامي أحمد بتاع الشئون القانونية في المعاهد قام بتعيين بنت أخته في ليسيه الهرم وأخته تعمل في مدرسة الحرية بالدقي ..

حالة العاملين في مدرسة الحرية بالدقي تصعب على الكافر ومديرة المدرسة خربتها على مدار 13 سنة ولسة قاعدة على تلها .. والمدرسة عليها أحكام نهائية بالطرد لصالح الملاك .. صرفت على مكتبها نصف ميزانية المدرس عشان تعوض أيام الحرمان اللي كانت عايشاها في شقة مشتركة على الروف في داير الناحية في بين السرايات جيزة .. حاليا في كمبوند في الشيخ زايد ..

مدرسة قومية المنيا في المنيا مدورها ولي أمر متحرش جنسيا .. وهو اللي بيختار مدير المدرسة والوكلاء ومجدد لوحدة فوق السن عشان بتعمل له أحلى صينية مسقعة .. وحتى مدير المدرسة السابق لما حصل على حكم قضائي بعودته للمدرسة .. تم تنفيذ الحكم على مدرسة في القاهرة وابعاده وإفساح الطريق لولي الأمر المتحرش ياخد راحته في المدرسة .. ده غير المدارس التي سيتم طردها وإخلائها في 2026 بموجب القانون والأحكام القضائية ..

يا ست أم نيازي وحياة النبي تصحي نيازي وتخليه يقول للجدع بتاع المعاهد القومية اللي بقاله 8 شهور بيسأل: البتاعة دي بتشتغل ازاي إن معظم المدارس القومية خرج من الخدمة وخرجت عن السيطرة وتحولت إلى تكيات تسيطر عليها عصابات الهليبة وبعضها تحول إلى خرابات بعد نهب أموالها وثرواتها ..

يا ست أم محمود خللي عمو أيمن موسى صاحبه اللي بيقعد معاه في مدارس الفاروق الخاصة بالقاهرة يبلغه إنه خربها وقاعد على تلها وإن وجوده زي عدمه وإنه م بيححلش الـ 27 ألف جنيه اللي بياخدهم كل شهر من تكية المعاهد .. والنبي تبلغي الوزير إن صاحبه بتاع المعاهد لا يشتعل ولا يساعد على الإشتعال ومحطوط على الشاحن من سنين ومفيش أمل إن البطارية تجيب شرطة وحدة ..