التعليم: فبراير 31 يوم
تخيل إن مساعد وزير التربية والتعليم لشئون المديريات اللي معاه دكتوراة مش عارف إن شهر فبراير 28 يوم فقط هذا العام وبيطالب مديري المديريات بموافاته بتنفيذ تدريبات تنمية الوعي الوطني لدي الطلاب في موعد أقصاه 31 فبراير .. لا وإيه كاتب: الثلاثاء 31 فبراير 2023 .. وقبل كدة عمم مساعد الوزير منشور ممهور بتوقيعاته كتب فيه شوكلت لجنى بدلا من شكلت لجنة ..
يا ست أم نيازي والنبي تصحي نيازي وتقولي له إن شهر فبراير مش 31 يوم .. يا ست أم محمود والنبي تصحي محمود وخليه يقول لمساعد الوزير لشئون المديريات أحمد المحمدي اللي بياخد مرتب 57 ألف جنيه شهريا غير السلاطات وتخصيص سيارة له بسائق وسكرتارية إن شهر فبراير عمره ما حصل 30 يوم ..
يا ست أم عبده والنبي تصحي عبده وخليه يقول لمساعد الوزير يسأل أطفال أي روضة أو السباك اللي جنبه عن عدد أيام شهر فبراير .. وبالمرة يحضر مع تلاميذ ابتدائي عشان يتعلم الإملاء من أول وجديد عشان يفرق بين: شكلت بضم الشين لأنها فعل مبني للمجهول وشوكلت اللي بيبصم عليها ..
شاهد: مساعد وزير التربية والتعليم للمديريات: «شوكلت» لجنة لمراجعة الهيكل الجديد ومعلمون: شكلك فاهم يا نصة
يذكر أن المدعو أحمد المحمدي مساعد وزير التربية والتعليم لشئون المديريات طبيب أسنان كان يعمل مع الدكتورة يوهانسن عيد مسئول «سبوبة» الجودة في مجلس الوزراء واستعان به رضا حجازي القائم بأعمال وزير التربية والتعليم لغاية م يجيبوا وزير وعينه مساعد وزير لشئون المديريات ..
